హమ్మబాబోయ్...

హమ్మబాబోయ్...
--------------------
భావరాజు పద్మిని - 19/11/15.

పూబోణుల పై మెరుగులు గాయబ్  
ఆంటీల మేక్ అప్ లు పోయెపోచె
సోగ్గాళ్ళ వేషాలన్నీ ఇట్స్ గాన్...
డాబులు చూపే దుస్తులిక వానిష్

ఎవరైనా ఒకటే అవతారం...
ఉన్న బట్టలన్నీ అటకెక్కి,
ఉన్ని బట్టలు దించి ఉతికేసి,
కదిలే గొర్రెల్లా, గంగిరెద్దుల్లా,
దీని దెబ్బకు తోకముడిచి,
నిండా కప్పుకు దాక్కోవాల్సిందే !

ఐస్ క్రీం లకు కాలం చెల్లింది,
ఏ.సి లకు రెస్టు దొరికింది,
వెన్నులో వణుకు పుట్టింది,
ఫానురెక్కలకు ఆర్నెల్లు విశ్రాంతి,
ప్రతిచోటా చలిమంటల సంక్రాంతి.

జానెడు బట్టలతో ఒళ్ళునింపుకునే
జాణలను సైతం దారికి తెచ్చి,
ముసుగు వీరులని వీరమ్మల్ని చూసి,
ముసిముసిగా నవ్వుతోంది చలిపులి.
హమ్మబాబోయ్... ఇకపై...
తాళజాల గలమా నీ ఉధృతి ?