Tuesday, June 13, 2017

నానీ, ఏమీ కహానీ ?

నాని ఎప్పుడూ ఇంతే, తవిక(కవిత)లో ఎంత క్లిష్టమైన పదాలు వాడితే అంత గొప్ప అనుకుంటాడు. మానవమాత్రులకు ఆ భాష అర్ధమవ్వాలంటే... క్లిష్టదుర్గమఅగమ్యగోచరం ! అతను రాసేవి సుమారుగా ఇలాగే ఉంటాయి, అర్ధాలు వెతికితే అనర్ధాలు జరగ్గలవ్, అలా చదివి నవ్వుకోండి అంతే !


నానీ, ఏమీ కహానీ ?
--------------------------
ప్రియా,

నిర్లక్ష్య కక్షలో నికృష్ట పక్షిలా నేను ప్రచరించుచూ ఉంటే,
రహదారి వైచెడి భ్రమణగోళ యంత్రము వలె నన్ను కుదిపావు.
నిశాంతతుషారతూణీర ప్రభంజన కంజనమేదో చెలరేగినది
అంచేత, అమందానందకందుడనై వేకువలో కుక్కుటంలా కూసితిని.
మలిజాము భ్రుంగారికా కల్లోలఘీర్ణవమేదో నా అంతరంగంలో
మరణ మృదంగం మ్రోగించి, నాపై ఊకుమ్మడి దండయాత్ర చేసినదే.
తుదకు, నడికవిత సముద్రంలో నన్నొంటరిని గావించి మళ్ళినావు
డెందారోదనల వేదనలతో ఆరోహణావరోహణ మాలిక పాడుతూ
అంతరింద్రియము దిక్కుతోచక దిక్కులుపిక్కటిల్లేలా రోదించుచున్నది.
ఏమి, వత్తువా, వచ్చి నీ స్వాంత్వనాశూన్యతరంగాలలో నన్ను తేలింతువా?
చెప్పుడీ... ప్రణయమోచని, లలితధ్వంసిని, మరాళతరళవిభేదిని, రమ్మిక.

***************************************

Monday, January 30, 2017

చల్లపెట్టి దండకం

చల్లపెట్టి(ఫ్రిజ్) దండకం
-----------------------
భావరాజు పద్మిని – 30/1/17

ఓ చల్లపెట్టీ !నువే ఇంటమెట్టీ ! సదా ఘోషతో గట్టి సందాడి చేయంగ నేమెచ్చి ఓమూల నిన్బెట్టి నీయందె ముక్కోటి దేవుళ్ళ రూపాల గాంచూచు గొల్చూచు నీమ్రోల నమ్రాత తోడాను వంగూచు ఆనాడు గోపాల కృష్ణూని నోరందు ఏడేడు లోకాల జూచేటి యాశోదలాగాను నీనోట నాకళ్ళు జొప్పించి గాలించుచుందూను నిత్యాము నాముద్దులాపట్టి !

నేరోజు నిద్దూర లేచీన వెంటానె దేవుడ్ని చూడాక పోయీన నీమోము కన్నూల నిండూగ కాంచీన తావూనె నీలోన నుండేటి క్షీరంపు పాకెట్టు తియ్యాక నారోజు ఎట్టూల గడ్చేను చల్లాని నాతల్లి !

నీపొట్టలోనేను శాకాల ,పాకాల మెండూగ కుక్కేసి, ఆపైన పాలూను, పెర్గూను, నీరూను, చిన్నాటి బారూను, పళ్ళూను, జూసూలు ఇంకాను పచ్చళ్ళు, పిండ్లూను, చాక్లెట్లు, ఎన్నెన్నొ తిండ్లన్ని బెట్టేసి యాపైన నిన్నాటి ,మొన్నాటి ,వారాముముందాటి కూరాల, చారూల, సాంబారులాబెట్టి వాటన్నిటిన్దించు వేర్వేరు రోగాల నాయందు పోషించి వర్ధిల్లుచుంటీని గామాత!

ఒక్కొక్క తావూన నీవద్ద నిల్చోని నెందూల కొచ్చీతినోమర్చి నీముద్దు బొజ్జాను గాంచూచునుంటాను గాయమ్మ సమ్మోహనాధీశ్వరీ! శీతలాధీశ్వరీ ! సర్వ భూలోక యంత్రేశ్వరీ ! ఎల్ల జీవూల ఆకాలి దీర్చేటి చల్లాని పెట్టావతారీ ! నమస్తే నమస్తే నమస్తే నమః !
ఫలశ్రుతి : భక్తిగా ఈ దండకం రోజుకు మూడు సార్లు చదివే వారికి శీతలా మాత కృప కలిగి, వచ్చే జన్మలో మంచు కురిసే చోటిలో పుడతారట ! చదవండి(వినండి) మరి !

https://soundcloud.com/padmini-bhavaraju/challa-petti

Friday, December 23, 2016

మృత తవిక

మృత తవిక
--------------
భావరాజు పద్మిని - 23/12/16

చీకేసిన తాటి టెంక లా ఎండిన బ్రతుకుల్లోకి
నత్తలా పాక్కుంటూ వస్తుంది మరణం,
మన ప్రక్కనే కూర్చుని జబర్దస్త్ ప్రోగ్రాం చూస్తూ
ఛానల్ మార్చమంటూ చిక్కిశల్యమై వేడుకుంటుంది.
ఎండిన కొబ్బరిమట్టొకటి ఈడ్చుకుంటూ వస్తూ,
బండెడు పాతనల్లనోట్లున్నట్టు చతికిలపడుతుంది.
నిర్జనారణ్యంలో రుధిర ధారల జలపాతాల హోరులో,
హెడ్ ఫోన్స్ పెట్టుకు పాప(పాప్) సంగీతం వింటుంది.
పగిలిపోయిన సైకిల్ టైర్ దొర్లించుకు వస్తూ,
సగం కాలిన మొక్కజొన్నపొత్తు లాక్కుని తినేస్తుంది.



మరణంతో రణం అంత తేలికేం కాదు...
వారుణం తాగితే ఎ.టి.ఎం. పిన్ మర్చిపోరు.
చితిమంటల కోరల్లో చిక్కిన చీపురుపుల్ల
రసాయనిక శక్తి మార్పిడిలో మాడిపోయినా,
బూడిదలో మరణమృదంగం వాయిస్తుంది.
అస్తిపంజరాల సౌధంలో కపాలాల తీగమీద
ఆరేసుకున్న పాత బట్టలు చలికి ఆరి చావట్లేదు.
ఆరబెట్టుకోడం తెలీక ఆవురావురుమంటుంటే,
మళ్ళీ ఈ దిక్కుమాలిన చావు తవికలొకటా... అకటా...
దయలేని వారు మీ కవికులము వారు.

("సచ్చినాక నవ్వలేవురా..." అన్న మనసుకవి ఆచార్య ఆత్రేయ గారన్నట్టు మనకి ఊపిరున్నంత వరకే నవ్వడానికి సమయం ఉండేది. కాని, కొంతమంది కవులు మాట్లాడితే చావు, చితిమంటలు, అస్థిపంజరాలు, కళేబరాలు ... వంటివి ఎత్తి రాస్తుంటారు. దీని ద్వారా ఏం చెప్పదలచుకున్నారో కూడా తెలీదు. ఈ మృత సాహిత్యం ఎందుకో నాకు నచ్చదు. వీరికి తెలియాల్సిన విషయం ఇంకోటి ఉంది. ఈ ప్రకృతి పెద్ద అయస్కాంతం(అద్దం) వంటిది. మన మనసులోని ఆలోచనలు ఏ విధంగా ఉంటే, ఆ విధమైన జీవనాన్నే ఇది ప్రసాదిస్తుంది. అంటే, మరణాన్ని గురించి మాట్లాడితే, వద్దు బాబోయ్ అనేదాకా ఆ రుచీ చూపించి ఒదులుతుంది. అందుకే వీలైనంత తక్కువగా ఈ మాటలని వాడడం, రాయడం మంచిది. జంధ్యాల గారు అన్నట్లు ఈ క్షు.ర (క్షుద్ర రచయతలకు/రచయిత్రులకు ) ఇదే నా నజరానా ! కేవలం నవ్వుకోడానికే. వాదోపవాదాలకు బోలెడంత తీరికున్నవారు వారి గోడ మీదే ఉన్న అమ్మలక్కలతో/అయ్యలన్నలతో వాదులాడుకోమని మనవి.)

Saturday, October 15, 2016

రాగంతో రోగం


రాగంతో రోగం
--------------
భావరాజు పద్మిని - 15/10/16

ఎప్పటినుంచి నిన్ను తొలిసారిగా చూసానో,
అప్పటినుంచి నీ కంట్లో ఎలాగైనా పడాలని,
మూర్చరోగిలా ఎక్కడికక్కడ దభేలున పడుతూ లేస్తూ,
తాళాల గుత్తులు పుచ్చుకుంటూ ఉన్నాను.
రెండు కిలోలు అమ్మాను, కాని నువ్వు చూడలేదే !

ఎప్పటినుంచి కిచకిచలాడే నీ మాట విన్నానో,
అప్పటినుంచి విక్స్ బిళ్ళలు డజను పట్టుకుని,
'గొంతులో కిచ్ కిచా?' అంటూ కోరింతదగ్గు వచ్చినట్టు,
నీ ధ్యాస మళ్ళించడానికి దగ్గుతూనే ఉన్నాను.
కానీ, నువ్వు నన్నసలు పట్టించుకోలేదే !

నీ పెర్ఫ్యూమ్ పరిమళం ముక్కుపుటాలకు తాకగానే,
మరే వాసనా వద్దనుకుని, మగ గాంధారిలా
ముక్కుకు స్వైన్ ఫ్లూ మాస్క్ కట్టుకు తిరుగుతున్నాను.
కానీ ఆ పెర్ఫ్యూమ్ ఏ బ్రాండ్ దో తెలీలేదే !



నువ్వు నావంక చూస్తే చాలు అదేంటో గాని
రక్తపోటు పెరిగేసి, హృద్రోగం వచ్చినవాడిలా
నా గుండె లకలకలక గీతం పాడుతుంది.
కొంపతీసి ఏమైనా బ్లాక్స్ ఉన్నాయో ఏమో ?

ఆకలి నిద్రా ఇంటి అడ్రస్ వదిలి పారిపోయాయి,
ఆంక్సైటి అన్నారు, ఏవేవో మందులిచ్చారు.
కీళ్ళరిగేలా నీవెనుక పరుగులు తీశాను
ఒక్కో మోకాలి చిప్పా మూడు లక్షలుట !
నువ్వు తప్ప లోకంలో ఏమీ కనిపించట్లేదు
4 థ్ స్టేజి ఆఫ్ హాల్యూసినేషన్ అంటున్నారు.


అసలు ఇన్ని రోగాల ప్రేమరోగానికి,
ఏ మల్టిస్పెషాలిటీ ఆసుపత్రిలో అయినా
ఎంత ఖర్చైనా చికిత్స వీలుతుందా అంట?
అందుకే ప్రేమలో పడే ముందు జాగ్రత్త కోసం
ముందస్తుగా మెడికల్ ఇన్స్యురెన్స్ చేయించుకోండి.
వీలయితే లైఫ్ ఇన్స్యురెన్స్ కూడానూ, ఏమంటారు ?

(అలా చదివి నవ్వుకుని, ఊరుకోవక్కర్లేదు... మీరు కూడా సరదాగా రాగాన్ని, రోగాన్ని కలిపి ఓ నాలుగు లైన్స్ రాయండి చెప్తా .)




Wednesday, October 12, 2016

నానీ, ఏమీ కహానీ ?

నాని, ఏమీ కహానీ ?
-----------------------
భావరాజు పద్మిని - 12/10/16

నాని ఎప్పుడూ ఇంతే, తవిక(కవిత)లో ఎంత క్లిష్టమైన పదాలు వాడితే అంత గొప్ప అనుకుంటాడు. మానవమాత్రులకు ఆ భాష అర్ధమవ్వాలంటే... క్లిష్టదుర్గమఅగమ్యగోచరం ! అతను రాసేవి సుమారుగా ఇలాగే ఉంటాయి, అర్ధాలు వెతికితే అనర్ధాలు జరగ్గలవ్, అలా చదివి నవ్వుకోండి అంతే !


నానీ, ఏమీ కహానీ ?
--------------------------
భావరాజు పద్మిని
12/10/16

ప్రియా,

నిర్లక్ష్య కక్షలో నికృష్ట పక్షిలా నేను ప్రచరించుచూ ఉంటే,
రహదారి వైచెడి భ్రమణగోళ యంత్రము వలె నన్ను కుదిపావు.
నిశాంతతుషారతూణీర ప్రభంజన కంజనమేదో చెలరేగినది
అంచేత, అమందానందకందుడనై వేకువలో కుక్కుటంలా కూసితిని.
మలిజాము భ్రుంగారికా కల్లోలఘీర్ణవమేదో నా అంతరంగంలో
మరణ మృదంగం మ్రోగించి, నాపై ఊకుమ్మడి దండయాత్ర చేసినదే.
తుదకు, నడికవిత సముద్రంలో నన్నొంటరిని గావించి మళ్ళినావు
డెందారోదనల వేదనలతో ఆరోహణావరోహణ మాలిక పాడుతూ
అంతరింద్రియము దిక్కుతోచక దిక్కులుపిక్కటిల్లేలా రోదించుచున్నది.
ఏమి, వత్తువా, వచ్చి నీ స్వాంత్వనాశూన్యతరంగాలలో నన్ను తేలింతువా?
చెప్పుడీ... ప్రణయమోచని, లలితధ్వంసిని, మరాళతరళవిభేదిని, రమ్మిక.





Monday, August 29, 2016

పోతపోసిన (అ)చలజీవులు

పోతపోసిన (అ)చలజీవులు
-------------------------------
భావరాజు పద్మిని - 29/8/16

పీతలోని చైతన్యం అంతా ఆవిడలోనే ఉంది. ప్రపంచంలోని నైరాశ్యం అంతా ఆవిడ ముఖారవిందంలో గోచరిస్తోంది. బెంజ్ కార్ లో వెళ్ళేవాడు సైకిల్ తొక్కేవాడిని చూసినట్టు, ముక్కు కిందకు జారిన కళ్ళజోడును పైకి తొయ్యడానికి కూడా బద్ధకిస్తూ, దాని పైనుంచి ఆవిడ చూసిన చూపులో ఆ నిర్లక్షం చూసి, "ఎందుకు పుట్టానా?" అని వాపోని వాడు ఉండడు. అసలు ఈ ప్రభుత్వ ఆఫీసులలో పనిచేసేందుకు మనుషుల్ని ప్రత్యేకంగా ఉత్పత్తి చేస్తాడేమో దేవుడు ! ఇప్పటి వరకు నేను వెళ్ళిన/చూసిన ఏ ఆఫీస్ లోనూ, కొండంత దైన్యం తప్ప, నవ్వులు, హుషారు కబుర్లు చూస్తే ఒట్టు.

" మేడం, టైం అవుతోంది, స్పీడ్ పోస్ట్ తీసుకోరా?" అడగడం అరడజనో సారి.

"కొన్ని యుగాలు ఆ జిగురు డబ్బా పక్కనే, బలిపీఠం పై తలపెట్టుకు వేచిఉండే బందీలా, కౌంటర్ పైన తలెట్టుకు పడుండలాగ... " అన్నట్టు ఓ చూపు చూసి, "వెయిట్ కర్నా పడేగా..." అంది.

సరేనని యుగాలు క్షణాల్లా గడుపుతున్నాను. గడియారం ముళ్ళు గుండె వేగంతో పాటు కదులుతున్నాయి. ఉద్యోగినమ్మ ఏవో కాగితాల లోకంలో ఉంది. ఆవిడ తలెత్తి చూడాలని, ముక్కోటి దేవతలకి ప్రార్ధన చేసుకున్నాను. అయినా, దేవుడు కరుణించినా, ఆవిడ కరుణాకటాక్ష వీక్షణాలకి ఈ అభాగ్యురాలు నోచుకోలేదు. ఇంత టైములో పక్కన అప్పుడే వచ్చిన వెన్నారొట్టా తిని బలిష్టంగా పెరిగిన ఓ శాల్తి, జీవితచరిత్ర అడక్కుండానే రాసేయ్యచ్చేమో అనిపించింది. ఆసరికి అక్కడ డబ్బాలో ఉన్న కవర్ల మీద అడ్రస్లు అన్నీబట్టీకొట్టి అప్పజేప్పేయ్యచ్చేమో అనిపించింది. మొత్తానికి అనుకున్న తరుణం ఆసన్నమయ్యింది. అమ్మ నింపాదిగా వచ్చి, గంపంత తన హ్యాండ్ బాగ్ ను తెరిచి, మృష్టాన్న భోజనం చేసిన వాడి కడుపులా ఉన్న అందులో ఏదో కుక్కగలిగింది. అప్పుడు కన్నెత్తి నన్ను చూసింది. నాకు ఆనందంతో తీన్ మార్ డాన్స్ చెయ్యాలనిపించింది. కాని, ఇక్కడ పంజాబీ డాన్స్ మాత్రమే చేస్తారు కనుక, ఆవిడ మళ్ళీ కంగారుపడి పారిపోతే, నాకళ్ళు కాచిన కాయలు, పళ్ళయ్యి, రాలిపోయి, నేలనబడి, మళ్ళీ మొలకెత్తుతాయేమో అన్న అనుమానాస్పదం వల్ల ఆగిపోయాను.



అమ్మ నింపాదిగా, కాలికింద పొరపాటున పాకే చీమలు చస్తాయేమో చూసుకుని, మనుషుల్ని తప్ప మరే ఇతర ప్రాణులలోని జీవాన్ని హరించకూడదని, చేసుకున్న తీర్మానాన్ని గుర్తుచేసుకుంటూ, వచ్చి, ఆసనమును అలంకరించి, కీ బోర్డు లాగింది. ఇంతలో ఓ అనుకోని మరో ఉపద్రవం. ఆవిడ మొబైల్ మ్రోగింది. హతోస్మి. అవతల ఆవిడ ఈవిడతో బాటు, ఈవిడ వీధి వీధందరి బాగోగులు అడుగుతోంది. ఈవిడ ఓ పది నిముషాలు మాట్లాడాకా, " అన్నట్టు, ఆంటీ, మీరు ఈ నెల పోస్టాఫీసు డిపాజిట్ కట్టారా?" అనడిగింది. "ఏమో, గుర్తులేదు," అంది అవతలి ఆంటమ్మ. ఇంతలో హీరొయిన్ పూజల ఉధృతికి బెదిరి, విఠాలాచార్య సినిమాల్లో హఠాత్తుగా పునర్జీవం పోసుకున్న నాయకుడిలా, పక్క కౌంటర్లో ఉన్న సాలభంజిక చైతన్యాన్ని సంతరించుకుని, "ఇంకా కట్టలేదు గీతా మేం..." అంది. నేను ఉలిక్కిపడి, వెన్ను తట్టుకుని, ఈ తమాషా అంతా చూస్తుండగా, సుమారు అరగంట లోపే ఆ ఊకుమ్మడి పలకరింపులు ముగిసాయి. ఈ లోపు నా దౌర్భాగ్యం వల్ల నాపక్కన ఇంకో శాల్తీ వచ్చి నిల్చున్నాడు.

"ఏంటి, ఇవాళ ఒక్క కవరేనా? ఎందుకు నా మీద ఇంత దయ చూపించావు? అన్నట్టు, నువ్వు పోస్టాఫీసు స్కీం లో చేరతానన్నావు? గుర్తుందా ?" అంటూ మొదలెట్టి, ఉన్న స్కీం లు, వాటి వడ్డీలు, చివరికి ముట్టే అసలు అన్నీ (తన కొచ్చే వాటా తప్ప) చెప్పసాగింది. అప్పుడే నా అజ్ఞానం తొలగిపోయి, ఆవిడ బాగ్ అంత లావుగా ఎందుకుందో జ్ఞానోదయం అయ్యింది. నేను దీనాతిదీనంగా... "మేడం..." అంటే...

"ఉ, ఊ, చేస్తున్నాగా... సహనం ఉండాలి. ఓర్పు ఉండాలి, లేకపోతే మీరు జీవితంలో ఏమీ సాధించలేరు," అంది. ఇక "చస్తే పోస్టాఫీసుకు వెళ్ళను, " అని ఐదొందలోసారి తీర్మానించుకుని, ఓ గంటా పదిహేను నిముషాల ఇరవై తొమ్మిది సెకన్లకు ఇంటికొచ్చి, " బుద్ధి, బుద్ధి" అనుకుంటూ, నాచెంపలు, మా అమ్మాయి ఆడుకునే బార్బీ బొమ్మల చెంపలూ అన్నీ వాయించాను. హే విశ్వచైతన్య పితా ! జడానికి, జీవానికి మధ్యస్తంగా సృష్టించిన ఈ ప్రాణుల్లో కాస్త చైతన్యం నింపవూ, ప్లీజ్..."

Wednesday, August 3, 2016

//రసాయనిక వంట//

//రసాయనిక వంట//
--------------------------
భావరాజు పద్మిని - 3/8/16

రసాయన శాస్త్రం చదివిన నాలాంటి వనిత అదే భాషలో వంటలు చెబితే ఎలా ఉంటుంది? ఇదిగో ఇలా ఉంటుంది.

పరిచయం:
భౌతిక చర్యలు పరివర్తనీయమైనవని మనకు తెలిసిందే. కాని, రసాయనిక చర్యలు అలాక్కాదు. వంట అనేది అపరివర్తనీయ(irreversible) రసాయనిక చర్య. ఇందులో రెండు లేక అంతకంటే ఎక్కువ సమ్మేళనాలు కలిసి చర్య జరిపి, ఉత్పన్నాలను ఇస్తాయి. వాటినే మనం తింటాము. ఆపై మనలో ఏమేమి ఉత్పత్తి అవుతాయో, వంటల్లో మీరు వాడే పదార్ధాల నిష్పత్తిని బట్టి ఉంటుంది. అన్నట్టు, ఈ రసాయనిక వంట చర్య వేగంగా జరిగేందుకు మనము ఉత్ప్రేరకాలను(catalyst) కూడా వాడవచ్చు. ఇక వంట చర్య వద్దకు వచ్చేస్తే...

లక్ష్యం :
కాకరకాయ హల్వా తయారుచేయుట
కావలసిన పదార్ధాలు:
పరీక్షనాళిక కాదు - పరీక్ష మూకుడు, సోడియం క్లోరైడ్ (దీనినే తెలుగులో ఉప్పు అందురు), మెగ్నీషియం సల్ఫేట్ (ఎప్సం సాల్ట్ - కడుపుకు ఉత్ప్రేరకం, విరేచానకారి), ముడి కాకరకాయలు(ముడి ఇనుము లాగా), పొడి చేసిన సుక్రోస్ కి రూపాంతరము (బెల్లానికి వచ్చిన తిప్పలు), ఆనిమల్ఫాట్ (నెయ్యి ) ఇత్యాదులు...

విధానము:
ముందుగా హెచ్.టు.ఓ తో ముడి కాకరకాయలను బహిర్గత చర్య జరిపించవలెను(కడగాలి అన్నమాట). అటుపై వానిని గ్రేటింగ్ చేసి, కొద్దిగా సోడియం క్లోరైడ్ కలిపి, సెంట్రీఫ్యూజ్ చెయ్యవలెను, ఆ పై ఫిల్టరేషన్ ప్రక్రియ ద్వారా ద్రావకాన్ని విడగోట్టవలెను. (తరిగి, మిక్సీ వేసి, పిండి పెట్టుకొనుటకు వచ్చిన...). అటుపై సుక్రోస్ రూపాంతర పొడి, ఎప్సం సాల్ట్ కలిపి పెట్టుకోవలెను. పరీక్ష మూకుడులో కాస్త ఆనిమల్ఫాట్ వేసి, బర్నెర్ పై హీట్ చెయ్యవలెను. అటుపై కాకరకాయ మిశ్రమాన్ని కలిపి, 15 -20 నిముషాలు ఉంచి, జరుగునవి గుడ్లప్పగించి గమనించవలెను.



పరిశీలనలు:
ముందుగా పరీక్ష మూకుడు వేడెక్కుతున్నను, అందు ఉష్ణోగ్రత పెరుగుదల ఉండదని, మేము ధర్మామీటర్ అందు పెట్టుట ద్వారా గమనించితిమి. ఇందుకు కారణము గుప్తబాష్పీకరణ శక్తి(latent heat of vaporization) . కాకరకాయ పరమాణువుల్లో ఉన్న అంతరపరమాణు బంధాలను అధిగమించే గతిశక్తి (kinetic energy) వాటికి వచ్చాకా, మనం ధర్మామీటర్ లో ఉష్ణోగ్రత పెరుగుదలను గమనించవచ్చు. అటుపై చర్య ముగిసే సరికి, ఆకుపచ్చరంగు సమ్మేళనాలు నల్లరంగు ఉత్పత్తులుగా మారుట చర్య ముగిసినది అని చెప్పుటకు చిహ్నము.

నిర్ధారణలు:
"మీ ఇంటి రసాయన వంట" కార్యక్రమంలో ఉత్పన్నాన్ని తిన్న ఆంకరమ్మ "ఇచ్చోటనే కదా !" అన్న పజ్జం పాడుకుంటూ వెళ్ళిపోయింది. ఎప్సం సాల్ట్ మహిమ ఏమగునో ఆమె మరుసటి దినము చెప్పిన తదుపరే నిర్ధారించగలము. అంచేత ఎవరి కాల్షియమ్, ఫోస్ఫోరస్, సోడియం మిశ్రమ సిరి వారిదని అందురు. ఇదియేమి అని ఆశ్చర్యపోవుచుంటిరా? ఇదియును తెలియదు, తమ సెల్ ఫోన్ లో సిమ్ము. దీనినే తెలుగులో 'దంత సిరి' అందురు.

గమనిక:
నిపుణుల పర్యవేక్షణ లేకుండా ఈ ఉత్పన్నమును ఎవరైనా గృహము నందు తయారుచేయుటకు ప్రయత్నించిన ఆపై మరుసటి దినము ఉదయమున జరుగు విపరీతములకు ప్రయోగము తెలిపిన వారు బాధ్యత వహించరు. అంచేత ముందుగా నన్ను నామినీ గా పెట్టి, భారీ మొత్తంలో ఎల్.ఐ.సి పాలసీ తీసుకుని, ఈ నూతన ఆవిష్కరణను ప్రయత్నించవలెను. ఇది చదవగా వికటించిన భావనల వలన ఇంత గొప్ప ఆవిష్కరణకు నాకు నోబెల్ బహుమతి ఇవ్వవలెనని మీకు ముచ్చట కలిగిన, కలుగవచ్చు. మొహమాటపడకుడు, ఆస్కార్ కు సైతము సిఫార్సు చేయుడు. ప్రయోగము కంచికి, మనము భవసాగారాలకి...